Новите статутарни измении отворење на СДСМ за граѓаните од сите слоеви, возрасти и етнички заедници, е сублиматот од 15 Конгрес на СДСМ.
Претседателот на партијата, Зоран Заев од Конгресот порача дека партијата не се согласува со ваква Македонија, која не е фер, не е демократска ниту правична земја, и ги повика сите што се согласуваат со ваквиот став да се приклучат.
Тој ги нарече авангардни статутарните промени во СДСМ, и први од ваков вид во Југоисточна Европа. Со нив, се зголемува учеството на младите во сите партиски органи од 20 на 30 проценти, а учеството на жените се зголемува од 30 на 40 проценти.
-Промените во градската организација ќе резултираат со победа на СДСМ на следните локални избори, но и на парламентарните избори. Начинот на новото организирање на општинските тела ќе донесе одговорност кон партиското работење, отстранување на внатрепартиските поделби и антагонизми, рече Заев.
Според него, од сега ќе се знае каде е одговорноста на еден неуспех, но и кој ќе ги понесе ловориките за одреден успех.
Како новина на денешниот Конгрес на СДСМ е што месните организации се враќаат на ниво на координативни тела, како и проширување на Централниот Одбор со членови од руралните средини каде според оценката на Заев дека партијата стои слабо. На Радмила Шеќеринска и избрана да ја врши новата функцијата во СДСМ – заменик претседател на партијата.
Клубот на жени се преименува во Форум на жени, а новина со изменетиот Статус се и партиските организации надвор од РМ.
-Огромното мнозинство не може да ја поднесе оваа општествена хаварија предизвикана од ВМРО-ДПМНЕ која резултира со разорена демократија, згазени институции, поданичко судство , угушени медиуми. Без никаква причина, зад решетки скапуваат новинари со нарушено здравје, Македонија по примерот на режимските општества е земја на политички затвореници, рече претседателот на СДСМ, Зоран Заев.
-Државата неконтролирано тоне во долгови, народот мизерува во сиромаштија, а се богати единствено семејната и партиска олигархија на ВМРО-ДПМНЕ.
– Деновиве колапсот на Македонија под водство на Груевски, беше меѓународно верификуван. Власта го доживеа најголемиот пораз на политиките на квазипатриотизам и евроскпетицизам. Македонија благодарение на концептот на премиерот не е ни вредна за спомнување од европските авторитети. За дебаклот, Груевски дрско и безобразно ги обвинува сите -опозицијата, домашните предавници, меѓународната заедница. Цел свет е виновен, само тој не е.
Според Заев 270.000 млади веќе ја напуштиле Македонија, тие што останаа се гушат во долгови.
-Ние сме силата што мора да ги оневозможи ветата што Груевски и ги наметна на Македонија. Да бидеме на јасно-СДСМ нема да дозволи прав да падне врз нашиот национален идентитет, нашиот национален јазик и нашата национална посебност. Ние ќе ја вратиме Македонија на правиот колосек, рече Заев.