Висока партиска делегација на ВМРО-ДПМНЕ предводена од претседателот на партијата и премиер Никола Груевски, а во која се и министерот за надворешни работи Никола Поповски и секретарот за меѓународна соработка на ВМРО-ДПМНЕ и пратеник во Собранието Владимир Ѓорчев, денеска присуствуваа на редовниот самит на Европската народна партија (ЕПП), што се одржува во Виена, Австрија.
Во присуство на лидерите на земји-членки на ЕУ, како и на претседателите на народните политички партии во Европа, Груевски како претседател на ВМРО-ДПМНЕ ја претставува Македонија на овој Самит, кој, како што се наведува во партиското соопштение, е одлична миожност за остварување контакти и интензивна комуникација со повеќе европски лидери.
На маргините на самитот претседателот Груевски оствари средба со Вилфред Мартенс, претседател на ЕПП, која е најмногубројна партија во Европскиот парламент.
Во разговорите премиерот Груевски упати благодарност за сестраната поддршка која Република Македонија ја добива од ЕПП во контекс на евроинтегративните процеси, како и поддршката за интензивирање на политичките односи и дијалогот во меѓународни рамки.
Претседателот Груевски истакна дека таквата поддршка е основа и за зајакнување на економските односи и промоција на македонските потенцијали за инвестирање на европскиот пазар.
Претседателот на ЕПП Мартенс го акцентираше активното учество и партиципацијата на Република Македонија на глобалните настани и процеси, како и влогот кој се дава во насока на надминување на предизвиците со кои се пресретнуваат државите од ЕУ, како што се состојбите предизвикани од европската должничка криза.