Претседателот на Собранието Талат Џафери одржува средба со координаторите на пратеничките групи. Џафери, како што најавија од неговиот Кабинет, во 14:00 часот ќе одржи прес-конференција.
До Собранието синоќа беше доставен Предлог-законот за одложување на пописот, што беше усвоен на седница на Владата. Пратеничките групи вчера до Собранието доставија измени на Изборниот закон во коишто се предвидува употреба на фингерпринт на локалните избори, како и пролонгирање на локалните избори за втората половина на октомври, поради одложување на пописот за септември.
Се очекува по оваа средба да се знае кога ќе се одржи седница за усвојување на овие закони. Претседателот на Собранието Џафери за МИА претпладнево рече дека седница ќе биде закажана согласно процедурите односно Деловникот на Собрнаието и Уставот.
Одложувањето на пописот и локалните избори, како и употребата на фингерпринтот и одблокирање на други закони во Собранието беше договорено на средбата на лидерите на двете најголеми партии во земјата СДСМ и ВМРО-ДПМНЕ Зоран Заев и Христијан Мицкоски.