После обвинувањата за нептриотизам и немање слух за државните интереси, што од Струга кон Зоран Заев ги упати ВМРО-ДПМНЕ преку устата на Ѓоко Илоски, секретар на општинскиот комитет на ВМРО-ДПМНЕ во Струга, најголемата опозициска партија порача дека интересите на државата не се бранат со манипулации и лажен патриотизам.
„На Република Македонија и е неопходен политички консензус по клучните прашањата од национален и државен интерес. Тоа е од суштинско значење за граѓаните на нашата земја.
Очигледно, на ВМРО-ДПМНЕ му е несфатливо дека интересите на граѓаните и државата не се бранат со декларирање и форсирање лажен патриотизам. Со етнички поделби и конфронтации. Со страв и закани од интерни тензии.
ВМРО-ДПМНЕ напорите и покажаната добра волја за коректност во политичкото делување, ги доживува како шанса за омаловажување на политичките конкуренти и за наметнување на сопствените погрешни, лоши и промашени политики како единствена опција. Всушност, мрачната и негативна кампања е суштината на нивното владеење.
Граѓаните на Кичево, Струга, но и на цела Македонија точно знаат во каква држава сакаат да живеат. Во успешна, просперитетна, перспективна Македонија. Растеретена од национални и етнички фрустрации. Интегрирана Македонија, како дел од европското семејство.
