Издавачката куќа „Перун Артис“ од Битола го објави еколошкиот роман „Чудесниот свет на полвот Ѓорѓе“ на црногорскиот писател за деца Жарко Вучиниќ, инспириран од древните легенди од Проштенските Планини на десниот брег на Тара.
Во приказната се опишани автентичните локации на тој крај, со што книгата директно го промовира туризмот заснован на природните вредности на Црна Гора, а поучува и на важноста на зачувувањето на здравата животна средина и вистинските општествени вредности.
Книгата беше промовирана во училиштето „Браќа Миладиновци“ во село Жван, Демир Хисар, и во основното училиште „Кочо Рацин“ во Прилеп. Поради пандемијата од коронавирусот, авторот Вучиниќ, кој е член и на Здружението за развој на руралните области и шумарството „УРОШ“, не присуствуваше на промоцијата, но со неговиот концепт „Природа, деца, фантазија – учиме со полвот Ѓорѓе“ учениците ги запознаа наставниците Влатко Стојковски и Габриела Стојаноска Станоеска. На крајот, сите деца добија по еден примерок од книгата за полвот Ѓорѓе, која им го разубави училишниот распуст.
Преведувач на книгата е Сашо Огненовски. Преводот и печтењето е спроведено во рамките на проектот „Промоција на еколошката свест во Северна Македонија преку книгата ’Чудесниот свет на полвот Ѓорѓе’ на црногорската невладина организација „УРОШ“.
Покрај тоа што е писател на интересни еколошки романи, Жарко Вучиниќ е и шумарски инженер, препознат по споменатиот концепт, чија цел е враќање на децата на природата.
„Природа, деца, фантазија – учиме со полвот Ѓорѓе“ е проект презентиран пред повеќе од 7000 деца од Црна Гора, Србија и Босна и Херцеговина.
Манифестациите, како и преводот и печатењето на книгата ги овозможи Постојаната група за регионален рурален развој во Југоисточна Европа, во партнерство со Германската асоцијација за меѓународна соработка, во рамките на проектот „Диверзификација на економските активности во руралните подрачја на Југоисточна Европа низ развојот на синџирот на вредностите“.