Поранешниот американски претседател Џорџ В. Буш изрази осуда на упадот на приврзаниците на Доналд Трамп во зградата на американскиот парламент во Вашингтон, нарекувајќи го тоа „мачен“ и „срцепарателен“ чин, објавија американските медиуми.
„Така се оспоруваат изборните резултати во банана републики, а не во нашата демократска република“, посочи тој.
„Јас сум згрозен од несовесното однесување на некои политички лидери од изборите и недостатокот на почит кон нашите институции, нашите традиции и нашето спроведување на законот, што можеше да се види денеска“, наведе Буш во изјавата во која не се споменува името на Трамп, но јасно се алудира на него и на другите републикански функционери, јави Си-Ен-Ен.
Според поранешниот претседател на САД, нападот врз Капитол бил инициран од „луѓе чии страсти биле разгорени од невистина и лажни надежи“.