Градскиот парк ќе биде збогатен со делови за спорт и за култура за чие оформување моментно се подготвуваат архитектонско-урбанистички проекти, пишува Дневник.
Ќе се прави алеја на спортот на предлог на Фудбалската федерација на Македонија (ФФМ) каде што ќе се постават обележја на заслужни македонски спортисти.
Kатчето за култура ќе биде наречено Парк на цивилизации, а таму ќе се поставуваат бисти, што ќе ги донираат странските амбасади, и тоа исклучително на дејци од културата од земјите од кои доаѓаат.
Kако локација што би послужила за оваа намена се споменува делот спроти арената „Филип Втори“, околу езерцето. Наши извори од Град Скопје информираа дека по изработката на проектот тој ќе мора да се одобри и од Општината Центар, по што проектот може да се реализира.
Освен со бисти на спортисти и значајни личности од културата, паркот ќе се збогатува и со други содржини. Градската власт во оваа и во наредната година планира да вложи во детски инсталации, фонтани и порти и во цветно и партерно уредување.