Наредната година ќе се реконструира зградата на СВР Куманово, најави министерот за внатрешни работи Оливер Спасовски при презентирањето на Предлог-буџетот за 2021 година. Од МВР информираат дека во иднина планирано е да се заменат прозорите, да се постави нова енергетски ефикасна фасада и кровна конструкција.
Зградата ќе добие и нова електрична инсталација, ќе се оспособат просториите за приведување и задржување на лица согласно стандардите, ќе се воспостави нов излез за службени потреби, ќе има нови санитарни јазли, одводна и доводна мрежа, предвидени се молерофарбарски и гипсарски работи, а ќе се зајакне и статиката.
-Министерството за внатрешни работи има повеќе активни рамковни спогодби за набавка на услуги за тековно одржување на објекти на МВР со изведба на сите видови на градежни работи, поправки, сервисирања и тековни одржувања, кои можат да се експлоатираат во кој било момент и истите ќе бидат искористени за предметната реконструкција. Во однос на финансиските средства кои ќе се издвојат за реконструкција на објектот, бидејќи е во почетна фаза средствата дополнително ќе бидат утврдени, информираа од МВР.
Објектот на СВР Куманово е изграден 1929 година, а потоа низ години во повеќе фази е доградуван.
Од МВР истакнуваат дека Министерството подолг период прави напори за подобрување на условите за работа на вработените во Министерството.
– Во таа насока во минатото реконструирани се голем број на објекти, а согласно стратешкиот план за санација и реконструкција на Министерството за внатрешни работи опфатени се повеќе објекти меѓу кои и објектот на СВР Куманово, велат од МВР.
Покрај реконструкцијата на СВР Куманово, следната година планирано е да се реконструираат и полициското одделение Ростуше и полициската станица Ресен.