Во Амбрела во ГТЦ – Скопје вечерва ќе се одржи промоција на две нови книги на Марјан Анѓеловски – романот „Колку убав погреб“ и драмата „Животот е краток и нејасен“.
Двете книги се поддржани од Министерството за култура, како проекти од национален интерес од областа на литературата и издавачката дејност за 2020 година.
„Колку убав погреб“ е роман кој зборува за животот на бездомникот Ангел, кој живее од смртта на другите, хранејќи се од погреб на погреб. Ангел, на еден погреб, ќе ја запознае девојката Марија и нивните животи ќе се променат засекогаш…“
– „Колку убав погреб“, ќе воскликне девојката Марија, а спроти неа, ќе го здогледа и запознае момчето кое живее од смртта на другите, што јас го толкувам како авторска мајсторија во преплетувањето на реалноста со имагинацијата и уште една победа на љубовта, наведува писателот Љупчо Силјановски, рецензент на двете книги.
„Животот е краток и најсен“ е сатирична драма, која ни ја претставува земјава во иднината. Како Македонецот би се однесувал во една нормалана, средена и богата држава? Што е она што не враќа назад? Футристичка фарса, за едно труло општество – систем на загубени вредности, општествено уредувње водено од хомофоби и партиски лумпен активисти, систем кој го разоруваат национализам, меѓуетнички конфликти и убедувања.
– „Животот е краток и нејасен„ е мошне инспиративен драмски текст што пред секој негов иден режисер ќе ја постави вечната загатка „Кои сме и каде одиме?“ , наведува рецензентот Силјановски.
Марјан Анѓеловски е автор, кој пишува и настапува низ земјава и низ Балканот со хумор, сатира и театарски претстави, а работи и како сценарист во тв емисии. Автор е на книгите „Македонијо, off мори мајко“, „Го силувавме ежот“, како и коавтор на книгата „Три ем“. Како сценарист има работено во телевизиските емисии „Фчерашни новости“ и „Еден на еден“. Добитник ена повеќе домашни и меѓународни награди, меѓу кои и наградата „Млади Типар“ за најдобар млад сатиричар на поранешните ју-простори во Пљевља – Црна Гора (2017 година).
Промотори на книгите ќе бидат Снежана Стојчевска и Денис Бојаров, а со свој читачки и театарски перформанс настанот ќе го збогатат актерите Јасмин Рамани, Огнен Велевски, Петра Ивановска, Сара Николовска и Елена Ѓорѓевска.
Настанот ќе биде организиран согласно сите протоколи за заштита од Ковид-19.