Интернационалниот фестивал на филмска камера „Браќа Манаки“-Битола ќе биде отворен на 14 септември со премиера на македонскиот филм „Соба со пијано“ на режисерот Игор Иванов – Изи.
Ова денеска на прес-конференција го истакна директорката на ИФФК „Браќа Манаки“ Лабина Митевска која рече дека и претставува задоволство што стана традиција и веќе трета година по ред се обидуваат со сите можни сили Фестивалот да биде отворен со македонски филм, започнувајќи со „Мајки“, „Трето полувреме“ и „Балканот не е мртов“ и оваа година со новиот филм на Изи.
Таа додаде дека филмот „Соба со пијано“ ќе биде во главната конкуренција.
Режисерот Иванов рече дека станува збор за ниско буџетен филм кој е завршен за 890.000 евра и за 26 дена снимање.
– Тоа бараше неверојатни подготовки. Имавме многу странски актери и странска екипа со фиксни термини. Филмот моментално е во конечна постпродукциска фаза што значи дека тој е релативно завршен, имаме нулта копија и недостига да се направат последните корици на тонот и на сликата и да ја испринтаме копијата, посочи Иванов.
Тој додаде дека по премиерата на филмот на фестивалот „Браќа Манаки“, ќе има проекции во Скопје и во другите градови во Македонија.
Продуцент на филмот и директор на фотографија е Томи Салковски, сценариото е на Жанина Мирчевска и Игов Иванов, а улогите ги толкуваат Наташа Петровиќ, Јовица Михајловиќ, Светозар Цветковиќ, Васил Зафирчев, Игор Стојчевски, Симона Спировска, Торстен Вогеш, Ива Крајнц, Дениз Абдула, Јагода Кумриќ, Фирдаус Неби и Невена Ристиќ. Специјални гости се Тони Палмер, Ханес Вегенер и Мајк Сарн.
Главниот извршен директор Никола Љушев рече дека и на 34.издание на Интернационалниот фестивал на филмска камера „Браќа Манаки“-Битола, кое ќе заврши на 20 септември, значајно внимание ќе биде посветено на програмата наменета за децата.