Македонскиот премиер Никола Груевски денеска, по повод Денот на победата над фашизмот, упати честитка до својот руски колега Димитриј Медведев.
– На овој датум се присетуваме на храброста и самопрегорот, на големиот број херои и огромниот број жртви, пред се на руска страна, кои беа дадени за победа врз силите на сите оние кои за време на Втората светска војна застанаа на страната на теророт и најгрубото газење на човековото достоинство и цивилизациски норми. Во таа борба, во која една од главните улоги ја имаше рускиот народ, застана и народот на Македонија, определувајќи се за антифашизмот, бранејќи ја со своите животи правдата и слободата. Денес, празнувајќи го 9-ти Мај, се поклонуваме пред таквата определба и пред големото дело на славната историја!, наведува Груевски во честитката.
Искажува огромна почит на сите оние кои се водеа од вредностите и од антифашистичките идеали во минатото и упатува порака за посветеност и целосна приврзаност кон современите демократски принципи, за соработката помеѓу народите и почитување на меѓународното право и правдата.
– Овој датум претставува уште еден заеднички симбол на длабоките и пријателски, историски, културни и духовни врски помеѓу Македонија и Русија. Верувам дека таквите врски ќе продолжиме да ги негуваме и соодветно унапредиме во секое поле од заеднички интерес, се вели во честитката.