Големиот христијански празник Воскресение Христово вчера на свечен начин со пригодни црковни литургии беше одбележан во духовните храмови „Свети Великомаченик Ѓорѓи“ во Нов Дојран, новообновената Црква „Свети Илија“ и Манастирот „Марија Магдалена“ во Стар Дојран со невообичаено голем број посетители од цела Македонија и соседна Грција.
Атрактивноста на туристичкиот крај за време на празниците ги преполни Божјите храмови и во деновите пред Велигден со посета за причесна по долгиот велигденски пост.
Поради бројната посетеност на верници од државата и од соседството годинава, како и лани, литургиите беа збогатени со величествен огномет на полноќ во знак на славењето на Христовата победа над смртта и воскресувањето.
Токму поради атрактивноста на одбележувањата, како туристичка атракција, свечената литургија ја следеше и дел од населението на општина Дојран со муслиманска вероисповест, кои на овој начин, почитувајќи ги празниците на своите сограѓани, оддадоа внимание и почит на празникот со учество во процесијата на вртење околу црквата во знак на Христовото Воскресение.
„Нашата религија обединува и сите што искажуваат почит кон неа се добредојдени во нашите црковни храмови“, велат црковните претставници од Дојран.
„Јас сум вистината, патот и животот“ се божјите зборови со кои прота Ѓорги Сламков им упати велигденска честитка на сите присутни и ги покани да присуствуваат на другите црковни одбележувања во недела навечер во црквата „Свети Великомаченик Ѓорѓи“ во Нов Дојран и „Свети Илија“ во Стар Дојран, каде што службата ја изведе отец Пантелејмон од братството при манастирот од Ново Село.
