Во седмата манифестација „Подарете книга за Велигденско јајце-симбол на Христовото Воскресение“ што ја организира општина Илинден годинава се обезбедени 5.000 книги.
– Подарените книги се наменети за првата „Општинска библиотека Илинден“, со што ќе се збогати библиотечниот фонд со нови содржини кои ќе ги надградуваат знаењата на студентите и учениците, информира општина Илинден.
По повод големиот христијански празник Воскресение Христово-Велигден во Домот на култура „Илинден“ беа изложени 2.013 украсени велигденски јајца што се даруваа на секој посетител што подари книга.
Книги годинава подарија голем број граѓани, ученици од основните училишта, повеќе издавачки куќи, преставници од бизнис секторот, повеќе општини, научни институции и факултети.
Досега во манифестацијата „Подарете книга за Велигденско јајце-симбол на Христовото Воскресение“ вкупно се собрани над 23.000 книги кои ги збогатија училишните библиотеки во основните училишта „Гоце Делчев“, „Ристо Крле“ и „Браќа Миладиновци“, а сега и првата „Општинска библиотека Илинден“.