Бирото за лекови ги регистрираше трите нови генерички лекови за пациентите со хронична миелоична леукемија согласно легиславата на Европската унија. Нашата легислатива за регистрација на лекови е целосно хармонизирана со легислативата на ЕУ. Ако лековите се регистрирани во ЕУ се регистрираат и кај нас.
Ова денеска на прес-конференција го истакна министерот за здравство Никола Тодоров, одговарајќи на новинарско прашање во врска со реакцијата на Здружението за помош на заболени од ХМЛ кое смета дека тие лекови не се соодветни за нивната болест.
Тој посочи дека лековите се регистрирани во земји-членки на ЕУ и само по тој основ мора да бидат регистрирани во Македонија, како и во секој друга членка на ЕУ.
– Дали ќе се користат зависи од тоа дали ќе бидат набавени и која ќе биде понудената цена. Станува збор за три светски познати компании кои имаат долгогодишно искуство во производство на лекови. Не велам дека едните или другите се подобри. Немам ниту такво искуство, ниту такво знаење, но апелирам сите кои немаат такво знаење или немаат достап до соодветни фармаколошки анализи за утврдување на квалитетот на лековите да не излегуваат да вакви информации и да не се креира непотребно паника во јавноста, рече Тодоров.
Не сум експерт, потенцира министерот, за утврдување на квалитетот на лековите, верувам дека ни тие не се експерти за утврдување на квалитетот на лековите кои ја лиферувале оваа информација.
– Ги молам сите кои не се експерти да не даваат квалификации за квалитетот на лекови. Така се корумпира системот, се нарушуваат правилата на функционирање особено во овој дел на фармацијата, а особено ова е случај кога станува збор за една ваква сензитивна, вулнерабилна категорија граѓани со кои не смее да се поигрува, ниту со нивните чувства, а најмалку со нивното здравје. Апелирам да се држиме до она што институциите го утврдиле. Доколку има сомнеж во тоа, тоа може да се провери, има начин како да се провери, истакна Тодоров.
Во врска со ставот на Здружението дека компаниите немаат клинички докажани испитувања дека нивниот иматиниб може да се користи во хронична фаза во која се тие пациенти, рече дека ако е навистина така тогаш има сериозно прекршување на правилата за регистрација на лекови.
– Не верувам дека е така. Ако излезе дека е така тогаш имаме голем проблем, затоа што веројатно компаниите кои ги доставиле лековите за регистрација доставиле лажни податоци за нив и тоа би било многу сериозна афера. Мора да бидеме внимателни и не смееме да дозволиме некој од какви било причини да си поигрува со чуствата на оваа категорија граѓани, најмалку тоа треба да биде од финансиска природа. Да оставиме на овие прашања да одговараат експертите, додаде министерот Тодоров.