Премиерот Никола Груевски во рамки на политичко економската посета на Федеративната Република Бразил се сретна со бразилскиот министер за надворешни работи Антонио Патриота.
На средбата е разговарано за можностите за продлабочување и интензивирање на економската соработка, трговската размена и соработката на полето на инвестициите, како и унапредување на севкупната соработка во сите сфери од заемен интерес.
Како што соопшти денеска владината прес-служба, била афирмирана волјата и заедничката иницијативност за надградување на правната рамка која ќе овозможува подинамична соработка помеѓу двете земји и било констатирано дека преку потпишување повеќе договори од областа на економијата, финансиите и образованието сериозно ќе се унапреди соработката и на државно ниво и на полето на приватната иницијатива помеѓу компаниите од двете земји, за што се преземаат и конкретни мерки.
На средбата на премиерот Груевски и бразилскиот министер за надворешни работи биле опфатени и теми за заложбата за воспоставување меѓупарламентарна соработка помеѓу двете земји на директно парламентарно ниво и соработка на полето на дипломатската едукација на кадри.