Претседателот на СДСМ Бранко Црвенковски по повод 8 април-Светскиот ден на Ромите, денеска упати честитка до сите граѓани на Република Македонија, припадници на ромската заедница.
– Овој ден е можност да се потсетиме на историјата, искуството и наследството на најголемото етничко малцинство во Европа. Иако Република Македонија предничи во нормативната вклученост и заштита на Ромите во општеството, за жал не можеме да избегаме од фактот дека ромскиот народ сè уште е социјално најзагрозената заедница. Секојдневната борба со дискриминацијата од најразлични видови, супстандардните услови за живот, тешкотиите во пристапот на образование и вработување треба да бидат приоритет за решавање и надминување на ваквата состојба на Ромската заедница во државата, вели Црвенковски во честитката.
Заедничка е одговорноста за сите граѓани, како што посочува Црвенковски, активно да се вклучиме во надминувањето на тешкотиите со кои се соочува и да и ги овозможиме условите со кои ромската заедница полесно ќе се наметне како рамноправен и одговорен чинител во општеството.
– Ромите се нераздвоен дел од државното ткиво на Република Македонија, кои со својата посветеност, милениумска култура и традиција, придонесуваат кон градење на стабилно мултиетничко и мултикултурно општество, вели Црвенковски.