„Катастрофално законско решение“, опозицијата продолжи жестоко да го критикува владиното законско решение за вработување и осигурување во случај на невработеност.
Ова е политика на криенка и лаги, сакаат да се нафалат со намалена невработеност, а ќе го бришат од евиденцијата секој на пример, невработен лекар, што ќе добие понуда да работи во Дебар како медицинска сестра.
„Министерот бега или се слика некаде, а овде состојбата е алармантна. Имаме 31, 6 отсто невработени. Наместо нови работни места, владата ги фрла парите за глупости . Со овој закон владата реши да капитулира во борбата со невработеноста“, рече Билјана Казанџиска.
За Весна Бендевска ова е најголема небулоза и најригорозен закон. Срамно е рече, што ова се обидуваат да го спакуваат како европски закон.
За Ивон Величковски, ова е закон за фризирање на податоците со кои сака власта да го пресретне новиот бран на невработени кој и се заканува на Македонија, законот е шминкерски и е за мачкање на очите на граѓаните.
„Доста е со манипулации, ширите невистини, нема да се брише никој“, реплицираше Ане Лошкоска.
Власта во форма на реплики ја повика опзоцијата да не шири лаги и да на ја плаши јавноста бидејќи велат, брзо ќе се види вистината.
Ердоган Срач, праша зошто нема критична маса кај пратениците од мнозинството и да признаат дека ова е манипулација со невработеноста. Власта, рече , со ова дава јасен сигнал дека ја губи битката со сиромаштијата и нема концепт за да го реши проблемот со невработеноста.
Дебатата по овој закон во петокот се водеше до доцна во ноќта. Законот е изгласан без гласовите на опозицијата.