„Дали го сакате Дали“ е новиот роман од писателот Христо Петрески, објавен од издавачката куќа “Феникс“.
Ова е негов трет роман, по романите “Лифтот (не) е за двајца“ кој е награден со “Рациново признание“ и “Книжевно перо“ и “Твоите = мои очи“, со што се заокружува трилогијата негови романи посветени на градот Скопје.
Романот “Дали го сакате Дали“, е поделен на три дела: “Бел град“, “Црн град“ и “Сив град“, а на крајот има и бонус од четири белградски раскази.
Во новиот роман, како и во претходните два, Петрески, го истражува, опишува и демистифицира урбаниот живот и амбиент, со сите негови специфичности, нелогичности и тајни.
Главен лик е анонимниот, но извонреден сликар Салватор Дали, кој е всушност питач и живее во подрумите на скопската населба Капиштец. Салватор своите ликовни дела ги подарува за топла чорба или чаша алкохол, а во Белиот, Црниот и Сивиот град се случуваат и безброј други несекојдневни нешта.
Петрески, во новото дело, испишува стварносно-надреална проза, проговорува јасно и недвосмислено, жестоко и полемички, откривајќи и разгрнувајќи бројни апсурди, парадокси, случувања, појави и феномени.