Центарот за сузбивање организиран и сериозен криминал – Одделот за недозволена трговија со дрога во содејство (ОНТД) со Царинската управа вчера заплени околу три килограми хероин, со што пресече меѓународен канал за недозволена трговија со хероин од Македонија до Австрија.
Министерството за внатрешни работи денеска соопшти дека по претходно добиено сознание за можен транспорт на хероин во 20 часот и 25 минути на граничниот премин „Табановце“, на излез од Македонија извршен е преглед и контрола на патници во автобус со македонски регистерски ознаки кој сообраќал на редовна автобуска линија од Струга преку Скопје до Виена.
Царинската управа на Македонија употребила куче за откривање наркотични дроги при што кај лицето М.Р. (40 ) од Струга, детектирано е присуство на наркотична дрога. Во пределот на стомакот околу половината пронајдени се пет пакувања со правоаголна форма облепени со селотејп трака исполнети со прашкаста материја со кафена боја и по направено тестирање на лице место, потврдено е дека се работи за наркотична дрога хероин.
Според соопштението, М.Р. за транспортот требало да добие 2.000 евра, од кои исплатени му се 500 евра како аванс пред патувањето, а остатокот требало да му биде исплатен откако ќе го изврши транспортот и хероинот ќе го предаде на непознато лице кое требало да го пречека на меѓународната автобуска станица во Виена.
Пронајдената прашкаста материја е предадена на вештачење во Одделот за криминалистичка техника на Министерството за внатрешни работи. Запленетиот хероин со висок квалитет на нарко пазарот при продажба на мало би достигнал цена од 200.000 евра.
Центарот за сузбивање организиран и сериозен криминал до Основното јавно обвинителство-Куманово поднел кривична пријава против М.Р. поради постоење основано сомнение дека сторил кривично дело „неовластено производство и пуштање во промет наркотични дроги, психотропни супстанции и прекурзори“. Лицето заедно со кривичната пријава во текот на денот ќе биде предадено на надлежен истражен судија за натамошна постапка.
ОНТД презема дополнителни мерки и активности заради целосно расчистување на случајот, утврдување и кривично правно санкционирање и на евентуално други инволвирани лица.