Во банките во Романија се забележува паника во врска со финансиската ситуација на Кипар. Откако властите во Никозија се согласија со барањата на меѓународните кредитори за оданочување на депозитите над 100.000 евра, голем број штедачи во Романија ги повлекуваат своите пари поради страв од евентуален притисок врз Букурешт да го прифати кипарскиот пакет антикризни мерки.
– Добивме информации дека некои клиенти започнале со повлекување на своите влогови, посебно оние кои имаат над 100.000 евра. Нема причина за подигнување на заштедите. Романија ја гарантира неприкосновеноста на влоговите, а со тоа и на банката „Марфин Романија“, чиј главен акционер е Народната банка на Кипар, која е во ликвидација, увери денеска гувернерот на романската Централна банка Мугур Исареску.
Според него, исто така, голем број штедачи ги префрлаат парите од мали и средни банки во поголеми.
Тој оцени дека појавената паника меѓу граѓаните нема да има посериозни последици врз банкарскиот систем во земјата.
– Нема никаква сличност меѓу ситуацијата на Кипар и оваа во Романија. Не само што нема сличност, туку постои разлика од земјата до небото, нагласи Исареску.