Претседателот Ѓорге Иванов придружуван од заменик-министерот за животна средина и просторно планирање Стево Темелковски денеска присуствуваше на нуркачката акција за чистење на Дојранското Езеро која по повод Светскиот ден на водите ја изведоа нуркачи од Македонија и Грција.
– Во Дојран сум да го одбележиме Светскиот ден на водите и да укажеме на совеста на луѓето затоа што водите се ограничен ресурс без кои нема ни живот. Со оваа акција за чистење на езерото укажуваме колку треба да бидеме посветени и за нас и идните поколенија. Убаво е да се види на ова место како македонските и грчките нуркачи го чистат езерото, затоа што тоа е заедничко. Со овој симболичен гест се укажува дека секоја заедничка акција може да даде резултат и успех за да ја сочуваме околината за идните поколенија, истакна претседателот Иванов.
Целта на акцијата што уште од вчера се спроведуваше на целата површина од езерото е да се реши заедничкиот македонско-грчки проблем со загадувањето на водата на Дојранското Езеро затоа што годинава Светскиот ден на водите е во знак на воспоставување добрососедски односи меѓу државите кои ги соединува водена површина.