Членовите, секој како што мислеше си ги предложи, но она потешкото, како што и се очекуваше, ја закочи работата.
Времето гази, а игрите за претседател на ад-хок Комисијата, која треба да ги расчисти случувањата во периодот околу 24 декември и да одлучи дали бил прекршен Уставот или не никако да престанат.
ВМРО-ДПМНЕ и СДСМ се уште не се договорија.
Закажани, па откажани средби, причините не се знаат, информациите различни и контрадикторни.
Имињата на кандидатите кои се во игра се уште се држат во тајност. Изборот на личноста на претседателот на Комисијата ќе биде исклучително значајно, бидејќи токму неговиот глас ќе биде и одлучувачки.
И додека ВМРО-ДПМНЕ се одлучи како членови да ги предложи пратениците, и директните учесници во настаните пред и на 24.декември, Илија Димовски и Благородна Дулиќ , СДСМ се одлучи за професорите Љубомир Данаилов Фрчковски и Рената Треневска Десковска.
Формирањето но и брзиот епилог и резултати од работата на Комисијата беа дел од политичкиот договор во присуство на меѓународниот фактор, за да се надмине политичката криза.
Еврокомесарот за проширување Штефан Филе, повторно во Скопје ќе биде на 8 април, за да провери до каде е исполнувањето на политичкиот договор.
Кко што стојат работите , за овој дел тешко дека ќе се испорачаат резултати. Дали можеби ќе го чекаме Филе, за да ја поттурне тој работата и да ни „помогне“ да избереме вистински човек за претседател на Комисијата?