Војната во Ирак САД ги чинела 1,7 билион долари плус дополнителни 490 милијарди долари плаќања што им ги должи на ветераните. Заедно со каматите трошоците во следните четири децении можат да надминат шест билиони долари, покажа истражување, цитирано од британските медиуми.
Војната го одзеде животот на најмалку 134.000 ирачки цивили и можеби придонесе за смртта на четири пати повеќе луѓе, соопшти проектот „Цена на војната“ на Институтот за меѓународни истражувања „Вотсон“, на универзитетот „Браун“.
Ако се додадат жртвите, пресметани од силите за безбедност, од бунтовници, новинари и хуманитарни работници, жртви на војната се меѓу 176.000 и 189.000 лица, се наведува во истражувањето.
Изготвениот извештај на околу 30 научници и експерти беше објавен пред десетата годишнина од американското навлегување во Ирак, на 19 март 2003 година.
Во документот се посочува дека САД од војната не заработиле речиси ништо, а Ирак е трауматизиран од неа. Таа им даде сили на радикалните исламистички борци од целиот регион, им попречи на правата на жените и го ослабна и без тоа лошиот здравствен систем, се забележува во извештајот.
Кампањата за обновата на Ирак во вредност од 212 милијарди долари во голем степен се покажа како неуспешна, затоа што поголем дел од парите се потрошени за безбедност или се прокоцкани заради измами, се потенцира во заклучокот на извештајот.