Сообраќајот на сите магистрални и регионални патни правци низ државата се одвива непречено, по претежно влажни коловози. Слаби врнежи од снег има на планинскиот превој Буково, но не се задржува на коловозот, соопшти Автомото сојузот на Македонија.
Патниот правец Неготино-Радовиш односно Неготино – Штип преку Лакавица, преку реката Вардар, кој беше затворен за тешки товарни возила поради оштетување на мостот, целосно е затворен за сите видови сообраќај, како и за пешаци, и е пренасочен преку Криволак, патниот правец Неготино-Криволак-Пепелиште само за лесни возила. Забраната за тешки товарни возила на тој патен правец се уште е во сила.
На патниот правец Демир Капија – Удово, кај тунелите на Демир Капија, се изведуваат градежни работи на пат. Поставена е светлечка сообраќајна сигнализација за регулирање на сообраќајот. Можни се повремени кратки застои во одвивањето на сообраќајот на тој дел од патот.
Автомото сојузот на Македонија препорачува внимателно возење, прилагодена брзина на движење и почитување на поставената сообраќајна сигнализација. Посебно внимание е потребно на делниците кои минуваат низ клисурите и засеците, особено на патните правци Катланово – Велес, Маврово – Дебар – Струга, Демир Капија – Удово, Кочани – Делчево и Берово – Виница, каде е можна почеста појава на одрони. Дежурните екипи на ЈП Македонијапат се на терен и редовно ги контролираат и одржуваат проодни сите патни правци.
Интензитетот на сообраќај на патните правци надвор од градските средини е умерен. На граничните премини нема подолготрајни задржувања за влез и за излез од државата.