Најдобар турски град за живеење за жените е Истанбул, покажуваат податоците на Турскиот статистички институт, цитирани од турскиот весник „Хуриет“.
Според податоците од 2011 година турскиот град е најдобро место за живот на жените според повеќе показатели, меѓу кои се нивото на образование, вработување, склучување бракови и друго.
Истанбул, во кој живеат седум милиони жени, е на прво место според учеството на жените во политиката.
Во турскиот мегаполис, исто така, е помал бројот на рано склучените бракови, а,исто така, нивото на образование е повисоко во однос на другите турски градови или 21 отсто од жените се со завршена гимназија или универзитет.
Најголемиот турски град, меѓутоа, има негативен имиџ по одос на самоубиствата на жените, а голем е и бројот на обидите за самоубиство.
Според податоците на Турскиот статистички институт меѓу десетте градови што се најдобри за живеење за жените во Турција е и градот Ризе – родното место на премиерот Реџеп Таип Ердоган.
Во Ризе, во североисточна Турција, често среќаван е матријархатот, кога жените имаат големо влијание во семејствата. Во црноморскиот град претставничките на понежниот пол можат да се занимаваат со одгледување чај или лешници, а потоа можат парите од заработувачката да ги инвестираат во што ќе посакаат, пишува „Хуриет“.