Унгарскиот Парламент денеска усвои низа спорни измени на Уставот, за кои Европската унија и Советот на Европа предупредија дека можат да ја загрозат демократијата и владеењето на правото.
„За“ амандманите гласаа 265 пратеници, 11 беа „против“, а 33 беа „воздржани“.
Претседателот на Европската комисија Жозе Мануел Барозо и генералниот секретар на СЕ Торбјорн Јагланд во заедничкото соопштение укажаа дека се поставува прашањето дали амандманите се во согласност со уставните вредности, европското право и стандардите на СЕ.
И претседателот на Европскиот парламент Мартин Шулц изрази жалење за усвојувањето на амандманите.
– Не сум единствен кој е загрижен за уставните измени и нивните евентуални негативни последици по владеењето на правото и почитувањето на основните права, посочи Шулц.
Тој изрази разочарување бидејќи унгарскиот премиер Виктор Орбан не го послушал неговиот предлог и не побарал мислење од Венецијанската комисија на СЕ пред гласањето.