Демократската партија на Албанците вечерва одржа митинг во општина Желино и ги претстави кандидатот за градоначалник на општината Љатиф Арифи и кандидатите за советници.
Првиот човек на партијата Мендух Тачи рече дека ДПА го предложила најдобриот кандидат за интересите на општина Желино.
-Арифи е праведен човек, искрен и успешен во работата. Убеден сум дека тој е најдобриот домаќин за општина Желино. Неговата победа нема да биде индивидуална ниту колективна, туку идеолошка, изјави Тачи.
Според него, 24 март е многу важен датум. – Гласот против оваа влада ќе потврди дека народот е многу незадоволен и бара промени. Промените за добро на жителите е ДПА, рече Тачи.
Кандидатот за градоначалник Арифи вети дека ќе работи напорно и чесно за развој на општината.
-ДУИ за сите овие години не направи ништо за да го подобри животот на граѓаните. Во Желино имаме голем проблем со невработеноста, со водоснабдувањето, да не зборуваме за образованието и културата. Јас и советничката листа на ДПА нудиме промени и ние со нашата работа ќе го вратиме Желино на правиот пат за граѓаните да живеат достоинствен живот, рече Арифи.