Општинската изборна комисија од Струга не ја прифатила заедничката советничка листа на ВМРО-ДПМНЕ и СДСМ за Струга која двете партии ја поднесоа и покрај одлуката на Државната изборна комисија за повлекување на првичната листа за советници на ВМРО-ДПМНЕ.
Со тоа ОИК не ја испочитувала и спровела одлуката на повисокиот државен орган ДИК, велат партиски извори за А1. Листата на советници била ставена на гласање и соодносот бил 3: 2 во однос за неприфаќање на листата.
Претседателот на ОО на СДСМ во Струга Ристе Чушкоски за А1 ја потврди оваа информација. Според него несфатливо е Општинската изборна комисија во Струга да не спроведува одлуки на орган кој е над него, а тоа е ДИК.
Има проблеми во Општинската изборна комисија. Ако ситуацијата остане непроменета и ако ОИК не ја повлече одлуката и не ја прифати листата и одлуката на ДИК за повлекување на првичната листа на ВМРО-ДПМНЕ тогаш ќе реагираме и ќе делуваме според сите законски и правни можности кои ни стојат на располагање. Несфатливо е ОИК да не ја почитува одлуката на ДИК. Со ова само се комплицираат работите и не сакам да помислам што стои зад ваквата одлука. Но се надевам има решение, рече Чушкоски.
Во просториите на ОИК во Струга вечерва атмосферата била напната.
