Премиерот Никола Груевски на вчерашното интервју во емисијата Х/О на Канал 5 одговорајќи на прашањето дали ќе прифати дуел со лидерот на СДСМ, рече дека Бранко Црвенковски треба да се подготви за дуел со историјата.
„Црвенковски нека се подготви за дуел со историјата. Со мене има секојдневни дуели ако мислите на политички натпревар и постојано излегување на избори и постојани порази. Нека се подготви за дуел со историјата. Неговиот дуел е со историјата“, рече Груевски.
Груевски во интервјуто рече дека граѓаните на овие избори ќе ја казнат и поразат здружената опозиција.
„Тие зборуваат за источен фронт, за широк фронт, за не знам каков фронт. Второ, ќе ми биде посебно задоволство, здружувањето од една страна на Црвенковски, Андов и Тито Петковски и од друга страна Георгиевски и Стојанче Ангелов и остатоците од партијата на Бошковски. Може и Мендух Тачи. Сите заедно на куп да си го чујат мислењето на граѓаните на Република Македонија. На купче. Да видат што направиле, каква доверба имаат, колку луѓето го ценат тоа што го сработиле во животот и да видат дали луѓето забораваат или не“, изјави премиерот Груевски.
