Кандидатот за градоначалник на ВМРО-ДПМНЕ за општина Карпош Јагнула Куновска пред жителите во Нерези порача дека таа ќе биде идниот градоначалник на општината, бидејќи освен од членството има масовна поддршка и од голем број неопределени гласачи. Сака фер избори со културни луѓе, а не со властољубци кои манипулираат со граѓаните.
– Јас сум за чесна борба, но за тоа мораш да имаш и чесни противкандидати, рече Куновска во врска со нападите на двајцата противкандидати во општината Стевчо Јакимовски и Андреј Петров.
Ги претстави проектите што планира да ги реализира и истакна дека за сите проблеми со кои се соочуваат граѓаните, а кои ги искажале на средбите досега, има решение, само ако се има слух, добра волја и намера да се решат.
– За секој проблем има решение. Во Карпош не чека борба, борба која самите мораме да ја поминеме ако сакаме и во нашата општина да има издржани капитални проекти. Јас сум народски, теренски човек, а не кабинетски и таква ќе останам и кога ќе седнам на градоначалничката фотелја. И тогаш ќе бидам меѓу вас, бидејќи на тој начин се дознаваат и решаваат секојдневните проблеми, рече Куновска.
На митингот во Нерези се обрати и вицепремиерот и министер за финансии Зоран Ставрески кој најави дека од понделник жителите на Нерези ќе добијат автобуска линија, која ќе сообраќа до Горно Нерези.