Го слушам Никола и вчера и завчера како вели дека за името ќе одлучувал народот.
Никола, не се криј зад народот. Народот ќе одлучува за име за кое ти претходно си се согласил и кое со свој печат си го заверил.
Вака лидерот на СДСМ, Бранко Црвенковски, во салата во Виница им се обрати на насобраните граѓани на митингот на „Сојузот за иднината“.
– Нашиот народ може многу да издржи, но порано или подоцна чашата ќе се прелее. Благодарение на вашата верба, доверба и решителност, во Македонија предвремени парламентрни избори ќе има. Ја го исполнил ветувањето на меѓународната заедница дека ќе го реши името, ја не го исполнил и по којзнае кој пат ги излажал, за Груевски нема бегање од народната казна – истакна Црвенковски.
Тој на виничани им порача дека иако бојкотот прекина, отпорот продолжува и ги повика да не го чекаат септември, туку работата да ја завршат со гласање на 24 март за кандидатите на здружената опозиција.
– Ајде да им вратиме затоа што од Македонија направија земја во која човек се плаши по телефон да зборува. Ги затворија сите критички настроени медиуми, а МТВ, Сител и Канал 5 станаа пералници на човечки мозоци. На 24 март мора да им вратиме за сите лажни тендери и анекси, за сите рекети што од стопанството ги наплатија – повика првиот социјалдемократ.
Тој порача дека е време на оваа агонија да и се стави крај и истакна дека е време граѓаните да ја донесат најкрупната одлука.
– Ајде на 24. март заедно да покажеме дека единствената Македонија не е таа на Никола Груевски. Ајде сите заедно да покажеме дека има подобра, горда и слободарска Македонија, свртена кон иднината – порача лидерот на СДСМ.
Тој на митингот во Виница го претстави и кандидатот за градоначалник на здружената опозиција, Венцо Вуинов, истакнувајќи дека тој е човек за кој ги уверува неговите сограѓани дека ќе направи подобар град за живеење.