Во издание на „Македонска реч“ од Скопје излезе од печат романот „Седум стравови“ на босанскиот писател Селведин Авдиќ, во превод на Ленче Тосева.
„Седум стравови“ на Авдиќ за кусо време беше објавен во Босна, Хрватска и Србија и кандидиран и финалист за неколку високи книжевни награди на тие простори, а потоа објавен и во Англија. Прогласен е за најдобра книга во 2010 на манифестацијата „Зеничка пролет“.
Романот почнува со булгаковски тип на фантастика во која нема јасни граници меѓу рационалното и ирационалното, но романот е пример на ненаметливо спојување на жанрови, и има вешт спој на демонски, енигматични, фантастични, љубовни и воени теми.
Во него е раскажана приказна за човековите стравови и ужаси. Приказната започнува движејќи се во насока на љубовна, односно по постљубовна фабуларна линија каде што главниот јунак по заминувањето на сопругата, осаменоста и деветмесечната депресија помината в кревет конечно се исправа, и соочувајќи се со своите стравови се обидува да зачекори во нешто што се нарекува нормален живот, додека понатаму, малку неочекувано, но без да ја напушти таа фабуларна линија, туку надополнувајќи ја и усложнувајќи ја, се отвора во насока на фантастичното во кое нема цврста граница помеѓу ирационалното и рационалното.
Селведин Авдиќ е роден во 1969 година, во Зеница, БиХ. Го уредува он-лајн списанието Журнал и емисијата на Радио БиХ „Фрее Фигхт“.
Во 2004 година ја објавил збирката раскази „Потстанари и други фантоми“, која е објавена и во Србија и во Босна и Херцеговина. Расказите од таа збирка се сместени во зборниците и антологиите на краткиот расказ во Хрватска, Србија, Црна Гора, Босна и Херцеговина, Словенија… За расказите од оваа збирка има добиено и неколку награди на различни конкурси на списанија. Некои од нив се преведени на англиски, германски, турски и словенечки јазик. Романот „Седум стравови“, е објавен во 2010 година.