Иран денеска ја отфрли идејата за нови преговори за својата нуклеарна програма, која ја изнесе францускиот претседател Емануел Макрон.
За време на вчерашниот состанок со американскиот претседател Доналд Трамп, Макрон рече дека „би требало да се отворат нови преговори” со Техеран за да се обезбеди „мир во регионот”.
– Отворањето прашања кои не спаѓаат во нуклеарниот договор не придонесува за зачувување на нуклеарниот договор, туку, напротив, ќе ја зголеми недовербата на потписниците, изјави портпаролот на иранското Министерство за надворешни работи, Абас Мусави.
Според него, европските земји потписнички, Франција, Германија и Велика Британија, „не се способни да ги исполнат своите обврски”.
Овие три земји повикуваат на одржување на договорот и покрај повлекувањето на Вашингтон. САД еднострано се повлекоа од тој договор во мај 2018 година.
Техеран се согласи да ја ограничи својата нуклеарна програма и се обврза никогаш да не направи атомска бомба во замена за укинување на економските санкции.