Заменик претседателот на Владата задолжен за европски прашања, Бујар Османи заедно со Амбасадорот на Република Франција, Кристијан Тимоние има воведни обраќања на меѓународниот семинар на тема „СЕП, Центарот за обуки и димензијата на човечките ресурси“, кој се реализира со поддршка на Француската агенција за развој.
„Денешниот настан е дел од серијата семинари и обуки кои ги организираме со поддршка на Француската агенција за развој, а се во насока на зајакнување на капацитетите на СЕП, како единствена институција со соодветната експертиза, знаење и искуство поврзани со европските процеси, а со цел поквалитетна подготовка на државата за процесот на преговори кој ни претстои“, нагласи Османи.
Османи изрази благодарност до Амбасадорот Тимоние и до својот советник кој доаѓа од француската Влада, Франсоа Лафонд, за поддршката во организацијата на ваквиот тип на обуки и семинари, со кои, како што истакна Османи, „не само што се зајакнуваат капацитетите на Секретаријатот за европски прашања туку истите претставуваат и јасен израз на добрите односи меѓу Република Франција и Република Северна Македонија.“
Османи посочи и на актуелноста на темат во периодот што претстои, упатувајќи на Извештајот на Европската Комисија чие објавување е наредната недела, при што истакна дека очекува истиот да го рефлектира реформскиот и политички напредок на земјава и дека очекува по квалитет да го надмине и минатогодишниот, и директно да посочи на подготвеноста на Република Северна Македонија за почеток на преговорите со Европската Унија оваа година.
