Виолинистката Ева Богоевска и пијанистката Маја Стојановска денеска ќе настапат во Лисабон во концертната сала на палатата „Фоз“, каде што ќе изведат дела од Моцарт, Бетовен, Шопен и Дебиси.
Богоевска е студент на Факултетот за музичка уметност во Скопје во класата на проф. Олег Кондратенко. Досега имаше успешни настапи во Виетнам, Малезија, во театарот „Марчело“ во Рим, „Карнеги хол“ во Њујорк и во Париз. Има голем број први награди на меѓународни фестивали и натпревари за класична музика во Санкт Петербург, Сан Ремо, Њујорк, како и Гран-при на интернационалниот фестивал за класична уметност во Израел.
Пијанистката Маја Стојановска, пак, веќе единаесет години живее во Португалија, каде што активно концертира. Работи како професор по пијано на Конзерваториумот во Монтижо.