Двојазични табли со новото име на државата на институциите и на Владата ќе бидат поставени по завршувањето на претседателските избори. Генералниот секратар на Владата, Драги Рашковски вели дека поради неможноста од распишување тендери за време на изборен процес согласно Изборниот законик, ќе се чека да завршат изборите за потоа да се објави тендер.
Тој додаде дека е задоволен од примената на Законот за употреба на јазиците и дека досега институциите речиси и да не правеле опструкции.
Најголема помош, како што рече Рашковски, ќе треба за новоформираната Агенција за спроведување на законот и првите кадровски решенија ќе бидат од Генералниот секретаријат. Тој додаде дека месец и половина од донесувањето на законот се потврдило дека тоа не е вовед во промена на државно уредување, туку се унапредиле правата на заедниците.
„Законот е на прав пат да го доживее своето светло”, додаде Рашковски.
Вицепремиерот Бујар Османи изјави дека најголем предизвик во примената на законот ќе биде преведувањето, бидејќи има институции со големи количини превод на дневна основа, се работи за вкупно 1 300 институции, а како пример го посочи преводот на документи во СЕП.
На денешната средба на меѓуресорската група, присусутвуваше и директорот на Агенцијата за јазиците Илбер Села, кој кажа дека донеле одлука и за простории за Агенцијата како и за кадровските прашања.
Галена Николовска-Ризвановиќ