Украинскиот претседател Володимир Зеленски денес изјави дека засилените напади на Украина врз цели во Русија му овозможуваат на Киев да преговара на рамноправна основа со Русија за крајот на војната.
Зеленски, на заедничка прес-конференција со генералниот секретар на НАТО, Марк Руте, во Киев, рече дека е само прашање на време дали Украина ќе го зголеми опсегот на ваквите напади, објави Ројтерс.
Тој додаде дека шест земји ја потврдиле својата подготвеност да придонесат во иницијативата на Листата на приоритетни барања на Украина (PURL) за купување оружје.
„Шест земји потврдија дека ќе дадат придонеси во PURL. Им благодариме многу. Нема да кажеме кои, нема да кажеме. Ова не е јавна информација. Мораме да купиме што може да се купи од Соединетите Американски Држави“, рече Зеленски, објави Укринформ.
Зеленски додаде дека форматот на Договорот за беспилотни летала е важен и дека Украина работи со партнери за да го направи ефикасен.
„Веќе работиме со неколку земји, со Франција, со Норвешка, со Германија, Шведска, Данска, Италија, со други партнери, за да создадеме европски антибалистички капацитети. Ова е многу тежок проект, но е многу неопходен“, истакна Зеленски.