Врховниот суд на Индија одлучи пратениците, кои се осудени на најмалку две години затвор, конечно да се повлечат од политиката.
Осудените пратеници од локалните парламенти и двата дома на федералниот Парламент ќе треба итно да поднесат оставки, без да имаат право да се кандидираат на следните избори.
Индиското правосудство во моментов води истраги за 160 федерални пратеници од различни партии и за над 1.400 функционери во локалните органи на власта.
Обвиненијата се различни – киднапирања, силувања, корупција, покажуваат податоците на Асоцијацијата за демократски реформи.
– Тоа е важен напредок кон оздравувањето на политиката во Индија, изјави Анил Баируал, национален координатор на Асоцијацијата.