Сепаратистички активисти од југоисточните делови на Украина денеска во Луганск прогласија создавање на „единствен координативен штаб за Југоисточна Украина“, кој ќе има задача да ги координира своите активност со сличните тела во другите региони и со центарот во Доњецк.
ИТАР-ТАСС јави дека во Луганск и во други населени места денеска се одржуваат „народни собири“ со задача да ги дефинираат прашањата по кои граѓаните ќе се изјаснат на референдумот, што за 11 мај го најавија проруските сепаратисти.
Меѓу прашањата за кои ќе се бара изјаснување на граѓаните на референдумот се и оние за трансформација на Украина во федерална држава, за создавање на посебен политички субјект во источните региони на земјата, како и за прогласување на рускиот јазик за службен.