Властите во кинеската престолнина ќе го казнат секој кој го користи Интернетот за да ја критикува владата во врска со поројните дождови од минатиот викенд, во кои имаше 37 жртви, пренесоа западните агенции.
Веќе четири дена властите на Пекинг немаат објавено нови податоци за жртвите на поројните дождови, кои беа најобилни во последните над шеесет години.
Откако видоа кадри на прелеани реки и поплавени патишта, многу жители на Пекинг сметаат дека реалниот број на жртвите е многу поголем од претставениот од владата.
Во вторникот кинеските власти ги повикаа официјалните медиуми да се концентрираат на објавувањето позитивни информации, како што се херојските постапки на спасувачите и помошта за населението.
„Во иднина строго ќе ги казнуваме оние кои користат Интернет за да пуштаат и лиферуваат политички гласини и да ја напаѓаат Комунистичката партија, државните лидери и системот“, изјави началникот на полицијата во Пекинг, Фу Чанхуа.
Според Пекинг, во поројните дождови загинаа 37 лица, но медиумите денеска соопштуваат дека има приближно 61 жртва, а според информации на Интернет жртвите се бројат со стотици, посочуваат американските медиуми.