Најмалку 36 лица загинаа, а десетина се повредени откако траект со повеќе од 120 патници се судри со друг и потона во близина на островот Лама во Хонг Конг.
Траектот во сопственост на електро компанија од Хонг Конг, ги носел работниците и членовите на нивните семејства да го погледнат огнометот по повод кинескиот Национален ден, кога се судрил со друг траект и веднаш почнал да тоне, пренесува Ројтерс.
„Во период од 10 минути, бродот потона. Моравме да чекаме најмалку 20 минути да дојдат спасувачките служби“, вели преживеан патник.
Повеќе од 100 луѓе се згрижени во болниците, пренесува агенцијата АП, истакнувајќи дека девет лица се тешко повредени и дека се наоѓаат во критична состојба. Најмалку едно лице се води како исчезнато.
Вториот траект претрпел оштетувања во сударот, но безбедно стигнал од островот Лама.
Оваа трагедија е најголема од 1996-та, кога повеќе од 40 луѓе загинаа во пожар во трговски центар во Хонг Конг.