Украинската армија објави дека нејзините сили ги потиснале руските војници од областа во градот Часив Јар на источниот фронт, додека силите на Москва известуваат за уништување на комуникациска кула и постигнат напредок.
Часив Јар се наоѓа на околу 20 километри западно од Бахмут, град заземен од руските сили пред една година и кој двете страни го гледаат како потенцијална точка за руско напредување во клучните градови во источниот регион Доњецк, вклучувајќи ги Краматорск и Славјанск.
Портпаролот на армијата Назар Волошин за новинската агенција Укринформ изјави дека украинските бранители ги потиснале руските сили од областа Канал во Часив Јар. „Непријателската војска ја нема“, рече тој.
Волошин изјави за други украински медиуми дека руските војници ги гранатирале украинските сили повеќе од 200 пати во изминатите 24 часа, главно на јужните приоди кон градот.
Генералштабот на украинската армија во четвртокот во доцните вечерни извештаи соопшти дека руските војници шест пати се обиделе да ги потиснат украинските сили во близина на Часив Јар. Беа одбиени три напади, а областа сè уште е зафатена од борби, рекоа тие.
Амбасадата на Украина во Вашингтон објави на социјалната платформа Х апел да се запре напредувањето на Русија кон Часив Јар, тврдејќи дека таа „очајно се обидува да го избрише градот, гаѓајќи дури и оштетени цркви и цивилни станбени блокови“.
„Мораме да ја спречиме Русија да го претвори во град на духови пред да биде предоцна“, велат тие.
Војниците на 24-та механизирана бригада објавија видео за кое велат дека покажува како руската војска го таргетира градот со системот TOS-1A Solntsepjok.
Руската новинска агенција Тас објави изјава од командантот на руската бригада Станислав Орлов, кој рече дека неговите сили уништиле комуникациска кула на највисоката точка во градот.
„Ова овозможи пробив без загуби“, се вели во соопштението.
Украина долго време очекуваше руски напредок кон градот, потсетува Ројтерс.
Главниот воен командант на Украина, Олександр Сирски, минатиот месец изјави дека московските сили се надеваат дека ќе го заземат Часив Јар до 9 мај и церемониите по повод годишнината од советската победа во Втората светска војна.