Иранските вооружени сили објавија видео од воени бродови, повторувајќи ја својата порака дека имаат целосна контрола врз стратешкиот Ормузски теснец и нема да дозволат премин на САД или на земјите вклучени во неодамнешните напади врз Иран. Иран претходно објави дека го затвора теснецот, еден од најважните морски патишта за глобален транспорт на енергија, за бродови што им припаѓаат на земји поврзани со нападите на САД и Израел.
„Нема сомнение дека Ормутскиот теснец е под мудро управување на храбрите поморски сили на Револуционерната гарда. Американските агресори и нивните партнери немаат право на премин тука“, соопшти Централната команда на Хатам ал-Анбија, единица одговорна за надгледување на воените операции. Во објавеното видео, барем еден брод вее и руско знаме. Не е јасно кога е снимено видеото, ниту пак неговата автентичност е независно потврдена.
Нападите врз бродови во Персискиот Залив продолжуваат. Британската организација UK Maritime Trade Operations (UKMTO) вчера објави дека вкупно 13 брода биле нападнати во Персискиот Залив, Ормутскиот Проток и Оманскиот Залив од почетокот на војната на 28 февруари до вчера.
Уште два брода беа нападнати ноќеска покрај ирачкиот брег, во близина на пристаништето Ум Каср во близина на Басра. Едно лице беше убиено, а 38 беа повредени во нападот, изјави раководителот на ирачката државна компанија за управување со пристаништа.
UKMTO, исто така, неодамна објави нови информации за инцидентот северно од Џебел Али во Обединетите Арапски Емирати. Капетанот на бродот извести дека контејнерскиот брод бил погоден од засега непозната ракета, која предизвикала мал пожар на бродот. UKMTO наведува дека целосната проценка на штетата во моментов е тешка поради темнината.
Американскиот претседател Доналд Трамп коментираше за ситуацијата во Ормутскиот Проток. „Протоците се во многу добра состојба. Ги уништивме сите нивни бродови. Тие сè уште имаат некои ракети, но не многу“, рече тој. Тој изјави дека САД ја „добиле“ војната со Иран, но дека ќе продолжат со воените операции сè додека работата не биде целосно завршена.
Тој исто така изјави дека САД „онеспособиле“ 58 ирански воени бродови. Американскиот претседател, исто така, тврдеше дека операцијата веќе постигнала голем успех, но предупреди дека не сака прерано да прогласи победа.