На самитот на лидерите на ЕУ и Западен Балкан во Брисел вечерва беше усвоена декларација во која тие ја потврдуваат целосната и недвосмислена посветеност на перспективата за членство на Западен Балкан во ЕУ и велат дека иднината на регионот лежи во Унијата.
Воедно, се подвлекува дека проширувањето на ЕУ е геостратешка инвестиција во мирот, безбедноста, стабилноста и просперитетот и се оценува дека има нова динамика во процесот на проширување и значителен напредок од последниот самит.
„Во наш взаемен интерес е да го забрзаме пристапниот процес врз основа на кредибилните реформи на партнерите, условите и принципите според нивните сопствени заслуги“, се вели во декларацијата.