Украинските единици, кои го опколија градот Славјанск, не им дозволуваат на цивилите да го напуштат градот и пукаат врз нивните превозни средства, изјави претставник на проруските сепаратистички „сили за самоодбрана“.
– Градот е опколен, но не ги пуштаат мирните жители да излезат од него. Неодамна семејство со мало дете се обиде со својот автомобил да замине, но врз нив беше пукано и притоа загинаа најмалку две лица, соопшти истиот извор.
Според него, како што јави ИТАР-ТАСС, на контролните пунктови околу градот се појавиле засега непознати луѓе во црни униформи.
– Можеме да претпоставиме дека се тоа луѓе од „Десен сектор“, но засега немаме точни податоци за ова прашање, додаде претставникот на проруските сепаратисти.
Освен тоа, според него, сепаратистите имаат информации и дека кон Славјанск „се приближува артилерија“, како и дека украинските единици се опремувале за гаѓање од ракетниот систем „Град“.