Украинските сили денеска ја повратија контролата врз градот Мариопољ, а во операцијата беа ранети четири лица.
Претседателот на Украина Петро Порошенко нареди таму привремено да се префрли обласна администрација на Доњецк, соопшти прес-службата на претседателскиот кабинет.
– Благодарение на хероизмот на украинските воени сили ситуацијата во Мариопољ е стабилизирана. Во врска со тоа сметам дека е соодветно доњецката обласна администрација таму да ја префрли својата работа, рече претседателот и додаде дека преместување ќе почне уште денеска.
Порошенко побарал од гувернерот на областа Серхиј Тарута преместување на администрацијата, чија зграда во Доњецк веќе два месеци е под контрола на проруските сепаратисти, кои таму го поставија својот штаб.
Во денешните судири се ранети четворица војници од специјалните единици, при што еден од нив е во тешка состојба, соопшти Националната гарда, составена од доброволци под команда на Министерството за внатрешни работи на Украина.