Украинските полицајци, кои беа под опсада од вчера попладне во локалната зграда на полицијата во градот Луганск, синоќа ја напуштија зградата оставајќи го своето оружје на проруски демонстранти.
Околу 22 часот и 40 минути по локално време триесетина полицајци излегоа од зградата, меѓу две редици цивили и вооружени мажи, по што се качија на автобус. Насобраната толпа пред зградата извикуваше „Вратете се дома“.
Судбината на оружјето на полицијата беше предмет на неколкучасовни преговори. Околу 21 часот еден од лидерите на бунтовниците преку мегафон изјави дека оружјето ќе мине под контрола на народната полицијата на Луганск. Претходно тој ги увери полицајците во зградата дека можат мирно да ја напуштат зградата.
Опасадата на зградата почна рано попладне, откако демонстранти ги заземаа без ниту еден испукан куршум локалната администрација, управа и регионална телевизија.