Францускиот претседател Емануел Макрон и неговата сопруга Брижит поднесоа тужба за клевета против американската блогерка Кандис Овенс, која тврди дека сопругата на францускиот лидер е родена како маж.
Тужбата од 218 страници е поднесена во суд во американската држава Делавер, објавува АФП.
Во неа, Макронови тврдат дека Овенс шири „дезинформации, клевети и лаги“.
Овенс, која има милиони следбеници на социјалните медиуми, постојано тврди дека Брижит Макрон претходно имала операција за промена на полот.
Овенс постојано ги повторуваше тие тврдења во својот популарен подкаст и на социјалните медиуми, а во март 2024 година рече дека би се обложила на „целиот свој професионален углед“ на верувањето дека Брижит Макрон „всушност е маж“.
Таа, исто така, објави серија видеа, нарекувајќи ги „Станување Брижит“ (или „Создавање Брижит“).
Теорија на заговор што циркулира на социјалните медиуми со години е дека првата дама на Франција е родена под името Жан-Мишел Троние (што всушност е името на нејзиниот брат).
Во нејзиниот подкаст од 23 јули, Овенс стоеше зад своите тврдења, велејќи за тужбата: „Тоа е едноставно глупаво“.
Францускиот претседател и неговата сопруга преку своите адвокати изјавија дека постојано барале од Овенс да ги повлече тврдењата за првата дама на Франција, но „на крајот дошле до заклучок дека судскиот процес е единствениот начин да се реши ситуацијата“.
„Кампањата за клевета на г-ѓа Овенс беше јасно дизајнирана да нè вознемири и да предизвика болка кај нас и нашите семејства и да привлече внимание и озлогласеност“, се вели во соопштението.
Во тужбата се тврди дека Овенс „ги игнорирала сите веродостојни докази што го побиваат нејзиното тврдење, поттикнати од бран добро познати теоретичари на заговор и докажани критичари“.
Овенс е обвинета и за лажно тврдење дека францускиот претседател и неговата сопруга се крвни роднини и дека Емануел Макрон е поставен на функцијата преку таен заговор од страна на американската Централна разузнавачка агенција (ЦИА).
„Ако некогаш постоел јасен случај за клевета, тоа е овој“, рече адвокатот Том Клер, кој го застапува парот.