Американскиот претседател Доналд Трамп објави на социјалната мрежа Truth Social снимка од екранот од пораката што ја доби од шефот на НАТО, Марк Руте.
Претставници на НАТО потврдија за Ројтерс дека Руте денеска му испратил порака на Трамп.
„Господине претседателе, драг Доналд, ви честитам и ви благодарам за вашата решителна акција во Иран, која беше навистина извонредна и нешто што никој друг не се осмели да го направи. Тоа нè прави сите побезбедни. Вечерва во Хаг летате кон уште еден голем успех. Не беше лесно, но сите ќе го потпишат договорот од петте проценти“, се вели во пораката.
„Доналд, нè доведовте до навистина, навистина важен момент за Америка и Европа, и за светот. Ќе постигнете нешто што НИЕДЕН американски претседател не можел да го направи со децении. Европа ќе плати ГОЛЕМА цена, како што и треба, и тоа ќе биде ваша победа. Пријатно патување и се гледаме на вечера кај Неговото Височество! Марк Руте“, стои во пораката.
Лидерите на 32 членки на НАТО ќе учествуваат денес и утре на самит во Хаг, каде што треба да го потврдат зголемувањето на трошоците за одбрана на пет проценти од БДП до 2035 година.