Американскиот претседател Доналд Трамп најави дека Мексико нема да мора да плаќа тарифи за стоките опфатени со трговскиот договор меѓу двете земји и Канада до 2 април. Трамп не потврди дали суспензијата се однесува и на Канада, но Канаѓаните очекуваат изземање „од иста природа“, изјави за Би-Би-Си извор од канадската влада.
Да потсетиме, тој вчера веќе најави дека привремено ќе ги ослободи производителите на автомобили од увозни даноци од 25 проценти само еден ден откако ќе стапат на сила.
Американскиот министер за трговија Хауард Лутник претходно денеска најави дека привременото ослободување од царините за увоз на автоделови од Канада и Мексико може да се прошири на сите производи кои се дел од Договорот САД-Мексико-Канада (USMCA).
USMCA беше основана за време на првиот мандат на Трамп. 34-те поглавја од договорот се однесуваат на автомобили, млечни производи и дрва, како и финансиски услуги. Договорот вклучува преглед на секои шест години.
Трамп објави на својата социјална мрежа Truth Social.
„По разговорот со мексиканската претседателка Клаудија Шејнбаум, се согласив дека Мексико нема да мора да плаќа тарифи за ништо што спаѓа во договорот USMCA“, рече тој.
„Важи до 2 април. Тоа го направив од почит кон спикерот Шејнбаум. Нашите односи беа многу добри и работиме напорно заедно на границата, како во однос на спречувањето на илегалните мигранти да влезат во САД, така и во однос на запирање на фентанил. Благодарам на спикерот Шејнбаум за напорите и соработката“, додаде тој.